is se pahale ki terii chashm-e-karam maazarat kii nigaah ban jaaye
pyaar Dhal jaaye mere ashkoN meN aarazuu ek aah ban jaaye
mujh pe aa jaaye ishq kaa ilzaam aur tuu begunaah ban jaaye
main teraa shahar chhoD jaauuNgaa
is se pahale ki saadagii terii lab-e-Khaamosh ko gilaa kah de
terii majabuuriyaaN na dekh sake aur dil tujhhko bevafaa kah de
jaane maiN beKhudii meN kyaa puchhuN,jaane tuu beruKhii se kyaa kah de
maiN teraa shahar chhoD jaauuNgaa
is se pahale ki tere honTo.n se Ghair hoTho.n ke jaam Takaraaye
is se pahale ke zulf ke baadal ajanabii baazuyoN pe laharaaye
aur terii bebasii ke nazaare merii aaNkhoN pe aag barasaaye
maiN teraa shahar chhoD jaauuNgaa
chhoD kar saahil-e-hayaat chalaa ab safiinaa meraa kahiiN Thahare
zahar piinaa meraa muqaddar hai aur tere honT dil-nashiiN Thahare
kis tarah tere aastaaN pe rukuuN jab na paaNv tale zamiiN Thahare
maiN teraa shahar chhoD jaauuNgaa
mujh ko itanaa zaruur kahanaa hai vaqt-e-ruKhsat salaam se pahale
toD luuN rishtaa-e-nazar maiN bhii tuu utar aaye baam se pahale
ye merii jaan meraa vaadaa hai kal kisii vaqt shaam se pahale
maiN teraa shahar chhoD jaauuNgaa
Subscribe to:
Post Comments (Atom)
No comments:
Post a Comment