kaTHin hai raahGuzar, thoRee door saath chalO
buhut kaRaa hai safar thoRee door saath chalO
tamaam u'mr kahaaN koi saath daitaa hai
yeh jaantaa hooN maGar thoRee door saath chalO
nashay meN choor hooN meN bhi, tumheN bhi hosh naheeN
baRaa mazaa hO aGar thoRee door saath chalO
yeh aik shab ki mulaaqaat bhi ghaneemat hai
kisay hai kal ki khabar , thoRee door saath chalO
abhee tO jaaG rahay heN charaagh raahoN ke
abhee hai door sahar thoRee door saath chalO
tavaaf-e-manzil-e-jaanaaN hameN bhi karnaa hai
FARAZ tum bhi aGar thoRee door saath chalO
Subscribe to:
Post Comments (Atom)
No comments:
Post a Comment